ຄະນະໂຄສະນາອົບຮົມແຂວງ ຈັດພິທີປາຖະກະຖາວັນປະກາດເອກະສາດ ຄົບຮອບ 75 ປີ.

ສ້າງຂື້ນເມື່ອ ວັນຈັນ, 19 ຕຸລາ 2020 07:54
ຂຽນໂດຍ ຄອຂ ອັດຕະປື

ຄະນະໂຄສະນາອົບຮົມແຂວງ ຈັດພິທີປາຖະກະຖາວັນປະກາດເອກະສາດ ຄົບຮອບ 75 ປີ.

               ເພື່ອສຶບຕໍ່ເສີມຂະຫຍາຍມູນເຊື້ອ 12 ຕຸລາ ມະຫາໄຊ ຄະນະພັກ - ຄະນະນໍາທຸກຂັ້ນໄດ້ເອົາໃຈໃສ່ ໂຄສະນາສຶກສາອົບຮົມການເມືອງ - ແນວຄິດ ໃຫ້ສະມາຊິກພັກ, ພະນັກງານ - ລັດຖະກອນ ແລະ ປະຊາຊົນບັນດາຊັ້ນຄົນທີ່ຂື້ນກັບການນຳພາ - ຄຸ້ມຄອງຂອງຕົນ ເຊີດຊູນໍ້າໃນຮັກຊາດຕິດພັນກັບການຊຸກຍູ້ການພັດທະນາ ໃຫ້ດໍາເນີນໄປຢ່າງຕັ້ງໜ້າ ແລະ ເປັນຂະບວນການຕໍ່ເນື່ອງດັ່ງນັ້ນ ວັນທີ 9 ຕຸລາ 2020 ຄະນະໂຄສະນາອົບຮົມແຂວງ ໄດ້ຈັດພິທີປາຖະກະຖາວັນປະກາດເອກະສາດ ຄົບຮອບ 75 ປີ ( 12 /10/1945 – 12/10/2020 ). ຢູ່ທີ່ຫໍປະຊຸມໃຫຍ່ຂອງແຂວງ ໃຫ້ກຽດປາຖະກະຖາໂດຍ ທ່ານ ຄໍາບຸນ ດວງພະບາງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ, ມີບັນດາການນຳຂອງແຂວງ, ການນຳຂອງເມືອງ, ລັດວິສາຫະກິດທຸກພາກສ່ວນ, ສະມາຊິກພັກ, ພະນັກງານ - ລັດຖະກອນອ້ອມຂ້າງແຂວງ ແລະ ນັກສຶກສາເຂົ້າຮ່ວມ ທັງໝົດ 367 ທ່ານ, ຍິງ 103 ທ່ານ.

          ພິທີດັ່ງກ່າວ ທ່ານ ຄໍາບຸນ ດວງພະບາງ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ຍົກໃຫ້ເຫັນບັນດາເຫດການສຳຄັນພາຍນອກ ແລະ ພາຍໃນທີ່ສ້າງເງື່ອນໄຂໃຫ້ແກ່ການປະກາດເອກະລາດ ແລະ ມູນເຊື້ອວັນປະກາດເອກະລາດ 12 ຕຸລາ 1945 ແມ່ນເປັນວັນປະຫວັດສາດທີ່ສຳຄັນຂອງຊາດ, ເປັນວັນແຫ່ງຄວາມເອກອ້າງທະນົງໃຈຕໍ່ຄວາມອາດຫານຊານໄຊໃນການຕໍ່ສູ້ບົນຈິດໃຈ  “ ຍອມຕາຍດີກວ່າເປັນຂ້ອຍຂ້າ; ຕາຍເພື່ອເອກະລາດດີກວ່າຢູ່ໃນແອກປົກຄອງຂອງຕ່າງຊາດ ” ຈາກນັ້ນມານໍ້າໃຈວັນທີ 12 ຕຸລາ ຈຶ່ງກາຍເປັນມູນເຊື້ອແຫ່ງການຕໍ່ສູ້ມີໄຊຂອງຄົນລາວຜູ້ຮັກຊາດພາຍໃຕ້ການນຳພາຂອງພັກ, ສາມາດປົດປ່ອຍຊາດໄດ້ຢ່າງສົມບູນ ແລະ ໄດ້ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.

Found a typo? Please select it and press Ctrl + Enter.