ພະແນກພະລັງງານ-ບໍ່ແຮ່ແຂວງ ອັດຕະປື ຈັດພິທີປາຖະກະຖາ-ເຊື່ອມຊຶມເອກະສານສຳຄັນຂອງຊາດ, ຂອງພັກ.

ສ້າງຂື້ນເມື່ອ ວັນພຸດ, 15 ກັນຍາ 2021 07:16
ຂຽນໂດຍ ຄອຂ ອັດຕະປື

ພະແນກພະລັງງານ-ບໍ່ແຮ່ແຂວງ ອັດຕະປື ຈັດພິທີປາຖະກະຖາ-ເຊື່ອມຊຶມເອກະສານສຳຄັນຂອງຊາດ, ຂອງພັກ.

          ວັນທີ 15 ກັນຍາ 2021; ທີ່ຫໍປະຊຸມໃຫຍ່ຂອງແຂວງ, ພະແນກພະລັງງານ-ບໍ່ແຮ່ແຂວງ ອັດຕະປື ຈັດພິທີປາຖະກະຖາ ວັນຢຶດອຳນາດ 23 ສິງຫາ ຄົບຮອບ 76 ປີ, ວັນສ້າງຕັ້ງອາຊຽນ ຄົບຮອບ 54 ປີ, ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 19 ປີ, ວັນຊາດ ສສ ຫວຽດນາມ ຄົບຮອບ 76 ປີ ແລະ ເຊື່ອມຊຶມຂໍ້ຕົກລົງວ່າດ້ວຍ ຍຸດທະສາດການຮ່ວມມື ໄລຍະ 2021-2030 ແລະ ສັນຍາວ່າດ້ວຍການຮ່ວມມືທະວີພາຄີ ໄລຍະ 2021-2025 ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ. ພາຍໃຕ້ການເປັນປະທານ ຂອງທ່ານ ນ. ບຸນນານ ບຸນນະແສງ ຄະນະປະຈຳພັກແຂວງ, ຫົວໜາຄະນະໂຄສະນາອົບຮົມແຂວງ, ເຂົ້າຮ່ວມບັນຍາຍ ມີ ທ່ານ ຈັນທະໜາ ກົມມະເມືອງ ອາດີດຄະນະປະຈຳພັກແຂວງ, ພະນັກງານບຳນານ, ຮອງປະທານສະຫະພັນນັກຮົບເກົ່າແຂວງ, ພ້ອມນີ້; ມີບັນດາສະຫາຍ ຄະນະພັກ-ຄະນະພະແນກ, ສະມາຊິກພັກ, ພະນັກງານ-ລັດຖະກອນ ພາຍໃນພະແນກເຂົ້າຮ່ວມຢ່າງພ້ອມພຽງ.

          ໃນພິທີດັ່ງກ່າວ ທ່ານ ບຸນນານ ບຸນນະແສງ ກໍ່ໄດ້ເລົ່າຄືນເຖິງປະຫວັດຄວາມເປັນມາ ແລະ ມູນເຊື້ອວັນຢຶດອຳນາດ 23 ສິງຫາ ທົ່ວປະເທດ ເຊິ່ງທ່ານໃດ້ຍົກໃຫ້ເຫັນເຖິງມູນເຊື້ອສາມັກຄີຕໍ່ສູ້ກູ້ຊາດຢ່າງອົງອາດກ້າຫານຂອງບັນພະບູລຸດ ທີ່ເສຍສະຫຼະເລືອດເນື້ອຕໍ່ສູ້ບໍ່ຍອມຈໍານົນຢ່າງດຸເດືອດຢຶດເຍື້ອຍາວນານ ຈົນສາມາດປົດປ່ອຍປະເທດຊາດ ຍາດໄດ້ໄຊຊະນະ ແລະ ສະຖາປານາ ສປປ ລາວ ໃນວັນທີ 2 ທັນວາ 1975, ຈາກນັ້ນ, ຜູ້ເຂົ້າຮ່ວມກໍ່ໄດ້ຮັບຟັງການປາຖະກະຖາວັນສ້າງຕັ້ງອາຊຽນ ຄົບຮອບ 54 ປີ, ມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 19 ປີ, ວັນຊາດ ສສ ຫວຽດນາມ ຄົບຮອບ 76 ປີ ແລະ ເຊື່ອມຊຶມ ສັນຍາວ່າດ້ວຍການຮ່ວມມືທະວີພາຄີ ໄລຍະ 2021-2025,  ຂໍ້ຕົກລົງວ່າດ້ວຍ ຍຸດທະສາດການຮ່ວມມື ໄລຍະ 2021-2030 ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ, ເຊິ່ງເປັນການຮ່ວມມືຮອບດ້ານ ເຖິງວ່າປະຈຸບັນການແຜ່ລະບາດຂອງພະຍາດໂຄວິດ-19 ໄດ້ສ້າງຄວາມຫຍຸ້ງຍາກ ແລະ ເຮັດໃຫ້ການໄປມາຫາສູ່ຊຶ່ງກັນ ແລະ ກັນ ມີຄວາມຫຍຸ້ງຍາກກໍຕາມ ແຕ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ-ຫວຽດນາມ ຍັງສືບຕໍ່ໄດ້ຮັບການຂະຫຍາຍຕົວເຂົ້າສູ່ລວງເລິກ, ມີປະສິດທິຜົນຕົວຈິງ ແລະ ແຕກດອກອອກຜົນຍິ່ງໆຂຶ້ນ.

         ຈຸດປະສົງຂອງການປາຖະກະຖາ-ເຊື່ອມຊຶມໃນຄັ້ງນີ້ ກໍ່ເພື່ອແນໃສ່ໃຫ້ພະນັກງານຫຼັກແຫຼ່ງພາຍໃນພະແນກ ໄດ້ພ້ອມກັນເຊື່ອມຊຶມກຳແໜ້ນ, ຮັບຮູ້ເຂົ້າໃຈ ຍົກສູງນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ເພີ່ມທະວີຄວາມສາມັກຄີປອງດອງທົ່ວປອງຊົນທັງຊາດ, ເຊີດຊູບົດບາດ ແລະ ຄວາມສາມັກຄີເປັນເຈົ້າຂອງປະເທດຊາດ ເພື່ອພ້ອມກັນສຸມໃສ່ທຸກກຳລັງວັງຊາ ແລະ ຄວາມສາມັກຄີຂອງຕົນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລເທື່ອລະກ້າວ.​

      

Found a typo? Please select it and press Ctrl + Enter.