ຄະນະໂຄສະນາອົບຮົມແຂວງ ອັດຕະປື ປະເມີນຜົນການປະຕິບັດວຽກງານຂອງພະນັກງານ - ລັດຖະກອນ ປະຈໍາປີ 2021.

ສ້າງຂື້ນເມື່ອ ວັນພະຫັດ, 11 ພະຈິກ 2021 03:54
ຂຽນໂດຍ ຄອຂ ອັດຕະປື

ຄະນະໂຄສະນາອົບຮົມແຂວງ ອັດຕະປື ປະເມີນຜົນການປະຕິບັດວຽກງານຂອງພະນັກງານ - ລັດຖະກອນ ປະຈໍາປີ 2021.

          ໃນລະຫວ່າງວັນທີ 4-5 ພະຈິກ 2021 ຄະນະໂຄສະນາອົບຮົມແຂວງ ໄດ້ຈັດກອງປະຊຸມປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ປະຈໍາປີ 2021, ຢູ່ທີ່ຫ້ອງປະຊຸມຄະນະໂຄສະນາອົບຮົມແຂວງ. ໃຫ້ກຽດເປັນປະທານ ຂອງທ່ານ ນ. ບຸນນານ ບຸນນະແສງ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີຄະນະ, ຄະນະຮັບຜິດຊອບປະເມີນຜົນພະນັກງານ - ລັດຖະກອນຂັ້ນແຂວງ ແລະ ພະນັກງານ-ລັດຖະກອນພາຍໃນເຂົ້າຮ່ວມທັງໝົດ 22 ທ່ານ, ຍິງ 10 ທ່ານ.

         ໃນພິທີດັ່ງກ່າວ ທ່ານ ນ. ບຸນນານ ບຸນນະແສງ ກໍ່ໄດ້ກ່າວເປີດກອງປະຊຸມ ພ້ອມທັງເຜີຍແຜ່ດຳລັດ ສະບັບເລກທີ 300/ລບ, ລົງວັນທີ 13 ກັນຍາ 2017 ແລະ ຄຳແນະນຳຂອງກະຊວງພາຍໃນ ສະບັບເລກທີ 06/ພນ, ລົງວັນທີ 02 ພຶດສະພາ 2018 ວ່າດ້ວຍການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ, ຜ່ານໂດຍທ່ານ ຄຳລຽນ ແສງກະເລົາ ຮອງຫົວໜ້າພະແນກພາຍໃນແຂວງ. ຈຸດປະສົງ ເພື່ອເຮັດໃຫ້ພະນັກງານ-ລັດຖະກອນ ໄດ້ຮັບຮູ້, ເຂົ້າໃຈ ແລະ ເປັນບ່ອນອີງໃນການຈັດຕັ້ງປະຕິບັດການປະເມີນຜົນ ແລະ ເຮັດໃຫ້ວຽກງານການປະເມີນໄດ້ດຳເນີນຢ່າງເປັນລະບົບ, ຖືກຕ້ອງສອດຄ່ອງ ກັບແນວທາງນະໂຍບາຍຂອງພັກ ແລະ ກົດໝາຍຂອງລັດ, ຮັບປະກັນຄວາມເປັນເອກະພາບ ແລະ ຖືກຕ້ອງກັບຄວາມເປັນຈິງ ແນໃສ່ເຮັດໃຫ້ວຽກປະເມີນ ແລະ ຄຸ້ມຄອງຜົນການປະຕິບັດວຽກງານຂອງພະນັກງານ-ລັດຖະກອນ ເວົ້າລວມ, ເວົ້າສະເພາະ ພະນັກງານພາຍໃນຄະນະໂຄສະນາອົບຮົມໃຫ້ມີປະສິດທິພາບ ແລະ ປະສິດທິຜົນ. ການປະເມີນຜົນຂອງຕົນເອງ ແລະ ໃຫ້ຄະແນນລວມໝູ່ຕ້ອງເບິ່ງຕາມສະພາບຄວາມເປັນຈິງ ໂດຍອີງໃສ 3 ເນື້ອໃນມາດຖານວັດແທກ ຄື: ດ້ານຄຸນທາດການເມືອງ-ຄຸນສົມບັດສິນທຳປະຕິວັດ, ດ້ານຄວາມຮູ້, ຄວາມສາມາດ-ປະສົບການ ແລະ ດ້ານຜົນສຳເລັດໃນການປະຕິບັດໜ້າທີ່ວຽກງານ.

           ຈາກນັ້ນ, ພະນັກງານ-ລັດຖະກອນ ແຕ່ລະທ່ານໄດ້ຂື້ນຜ່ານບົດເກັບກ່ຽວຜົນງານໃນໄລຍະ 1 ປີຜ່ານມາ, ເຊິ່ງມີທັງວຽກງານທີ່ຜ່ານຜົນສຳເລັດ, ຈຸດດີ, ຈຸດອ່ອນ-ຂໍ້ຄົງຄ້າງ, ວິທີແກ້ໄຂໃນຕໍ່ໜ້າ ແລະ ຜ່ານຄະແນນປະເມີນຜົນຂອງຕົນເອງ ຈາກບັນຫາດັ່ງກ່າວ ແຕ່ລະທ່ານຍັງໄດ້ມີການປະກອບຄຳຄິດຄຳເຫັນເຊິ່ງກັນ ແລະ ກັນ ໃນລັກສະນະຊ່ວຍເຫຼືອກັນ, ກໍ່ສ້າງປັບປຸງຈຸດອ່ອນ, ເສີມຂະຫຍາຍຈຸດດີ ແລະ ເຮັດໃຫ້ກອງປະຊຸມຄັ້ງນີ້ມີບັນຍາກາດຟົດຟຶ້ນ, ກວ້າງຂວາງ ແລະ ມີເນື້ອໃນໜັກແໜ້ນ.

 

 

Found a typo? Please select it and press Ctrl + Enter.