ເມືອງຊານໄຊ ໄຂກອງປະຊຸມຄົບຄະນະບໍລິຫານງານພັກເມືອງ ຄັ້ງທີ VI ສະໄໝທີ XIII.

ລາຍລະອຽດ

ສ້າງຂື້ນເມື່ອ ວັນພະຫັດ, 27 ມັງກອນ 2022 03:03

ຂຽນໂດຍ ຄອຂ ອັດຕະປື

ເມືອງຊານໄຊ​ ໄຂກອງປະຊຸມຄົບຄະນະບໍລິຫານງານພັກເມືອງ​ ຄັ້ງທີ VI ສະໄໝທີ XIII.

            ວັນທີ 25 ມັງກອນ 2022 ນີ້, ເມືອງຊານໄຊ ແຂວງອັດຕະປື​ ໄດ້ໄຂກອງປະຊຸມຄົບຄະນະບໍລິຫານງານພັກເມືອງ ຄັ້ງທີ​ VI​ສະໄໝທີ VIII ຂື້ນທີ່ຫໍປະຊຸມໃຫຍ່ຂອງເມືອງ,​ໂດຍການເປັນປະທານຂອງສະຫາຍ ສູວັນສີ ແກ້ວວີເສີດ ກໍາມະການພັກແຂວງ ເລຂາພັກ, ເຈົ້າເມືອງຊານໄຊ,ໃຫ້ກຽດເຂົ້າຮ່ວມມີສະຫາຍນາງ ບຸນນານ ບຸນນະແສງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ,ມີບັນດາສະຫາຍຄະນະປະຈໍາພັກ,ກໍາມະການພັກ,ເລຂາຄະນະພັກ,ຫົວໜ້າ-ຮອງຫົວໜ້າຫ້ອງການ​ ຕະຫຼອດຮອດເລຂາພັກບ້ານ-ນາຍບ້ານເຂົ້າຮ່ວມ.

ກອງປະຊຸມໄດ້ຕີລາຄາຄືນການຊີ້ນຳ-ນຳພາການຈັດຕັ້ງປະຕິບັດວຽກງານຮອບດ້ານຂອງຄະນະບໍລິຫານງານພັກເມືອງຊານໄຊ ປະຈຳປີ 2021 ແລະ ທິດທາງແຜນ​ການ ປີ 2022,ພ້ອມທັງຜ່ານຮ່າງບົດສຳຫຼວດການຊີ້ນຳ-ນຳພາລວມຂອງຄະນະບໍລິຫານງານພັກເມືອງ ປະຈຳປີ 2021,ບົດສະຫຼຸບການກໍ່ສ້າງຮາກຖານການເມືອງ ປີ 2021 ແລະ ທິດທາງແຜນການ ປີ 2022,ເຊິ່ງທົ່ວເມືອງຊານໄຊມີ 1 ອົງຄະນະພັກເມືອງ,ມີ 9 ຄະນະພັກຮາກຖານ,ມີ 75 ໜ່ວຍພັກ,ມີສະມາຊິກພັກ1.​275 ສະຫາຍ,ຍິງ 274 ສະຫາຍ,ມີສະມາຊິກພັກສຳຮອງ 51 ສະຫາຍ,ຍິງ 28​ ສະຫາຍ,​ຂະ​ຫຍາຍໃໝ່ມີ 33 ສະຫາຍ,ຍິງ10 ສະຫາຍ,ໄດ້ມອບ-ຮັບໃບຢັ້ງຢືນໜ່ວຍພັກປອດໃສ,ເຂັ້ມແຂງ,​ໜັກແໜ້ນມີ 46 ໜ່ວຍພັກ, ໜ່ວຍພັກແຂງ 21 ໜ່ວຍພັກ,ໜ່ວຍພັກກາງ 8 ໜ່ວຍພັກ,ມີສະມາຊິກພັກຮັບບັດແດງ1.056 ສະຫາຍ,ຍິງ 198 ສະຫາຍ,ໄລຍະ1 ປີຜ່ານມາຄະນະພັກແຕ່ລະຂັ້ນໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກຕາມມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ ມະຕິກອງປະຊຸມໃຫຍ່ ຄັ້ງທີ XI ຜູ້​ແທນອົງຄະນະພັກແຂວງອັດຕະປື ແລະ ກອງປະຊຸມໃຫຍ່ຄັ້ງທີ XIII ຜູ້ແທນອົງຄະນະພັກເມືອງຊານໄຊ,​ພ້ອມທັງໄດ້ເອົາ​ໃຈໃສ່ສຶກສາອົບຮົມການເມືອງ-ແນວຄິດຢ່າງຕໍ່ເນື່ອງ,ນໍາເອົາແນວທາງນະໂຍບາຍຂອງພັກ,ລະບຽບກົດໝາຍຂອງລັດ, ມະ​ຕິ,ຄໍາສັ່ງ,ແຈ້ງການຂອງຂັ້ນເທິງລົງເຜີຍແຜ່ໃຫ້ແກ່ສະ​ມາຊິກພັກ,ພະນັກງານ-ລັດຖະກອນ,ທະຫານ,ຕໍາຫຼວດ,​ຕະຫຼອດຮອດພໍ່ແມ່ປະຊາຊົນບັນດາເຜົ່າໄດ້ທົ່ວເຖິງ. ໃນໄລຍະຜ່ານມາເມືອງຊານໄຊ​ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ປອດໄພ ແລະ ເປັນຄວາມເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຕໍ່ເນື່ອງ 98,87%, ດ້ານກະສິກໍາຂະຫຍາຍຕົວ 73,94%, ດ້ານອຸດສາຫະກໍາ 8,55%, ດ້ານການບໍລິການ 17,51%ລວມຍອດຜະລິດຕະພັນພາຍໃນບັນລຸ 89.​145 ຕື້ກວ່າກີບ, ລາຍຮັບສະເລ່ຍໃສ່ຫົວຄົນໄດ້ 3​ລ້ານ​ 4​ ແສນ​ ກີບຕໍ່ຄົນຕໍ່ປີ,​ໄດ້ເອົາໃຈໃສ່ດືງດູດນັກລົງທຶນສະໜັບໜູນທຶນຮອນເຂົ້າໃນການປັບປຸງ-ກໍ່ສ້າງພື້ນຖານໂຄງລ່າງ,ວັດຖຸເຕັກນິກ,ວິຊາຊີບ,ຖືເອົາການພັດທະນາຊັບພະຍາກອນມະນຸດ,ພັດທະນາສີມືແຮງງານ ເຮັດໃຫ້ບັນດາຂະແໜງການດັ່ງກ່າວ​ມີການຂະຫຍາຍຕົວທາງດ້ານປະລິມານ ແລະ ຄຸນນະພາບນັບມື້ດີຂື້ນເທື່ອລະກ້າວ.

ກອງປະຊຸມໄດ້ແບ່ງຈຸສຳຫຼວດ, ປະເມີນຈັດປະເພດຄວາມຮັບຜິດຊອບຂອງພະນັກງານນຳພາ, ພະນັກງານຫຼັກແຫຼ່ງ​ ແລະ​ ຜ່ານຮ່າງບົດສຳຫຼວດບຸກຄົນພາຍໃນຄະນະພັກຕື່ມອີກ.

ຂ່າວ: ສຸກສະຫວ່າງ